राज्यातील वरिष्ठ आयपीएस अधिकाऱ्यांच्या बदल्या; पुणे पोलिसांत मोठे फेरबदल
पोलीस महानगर नेटवर्क
मुंबई : राज्य शासनाच्या गृह विभागाने राज्यातील वरिष्ठ आयपीएस अधिकाऱ्यांच्या बदल्यांचे आदेश जारी केले असून, पुणे शहर पोलीस आयुक्तालयासह विविध महत्त्वाच्या विभागांमध्ये मोठे फेरबदल करण्यात आले आहेत. या बदल्यांमुळे पुणे, कोल्हापूर, कोकण आणि राज्य गुन्हे अन्वेषण विभागाच्या कामकाजावर परिणाम होण्याची शक्यता व्यक्त केली जात आहे.
पुणे शहर पोलीस आयुक्तालयाचे सहपोलीस आयुक्त रंजनकुमार शर्मा यांची कोल्हापूर परिक्षेत्राच्या विशेष पोलीस महानिरीक्षकपदी बदली करण्यात आली आहे. त्यांच्या जागी कोकण परिक्षेत्राचे विशेष पोलीस महानिरीक्षक संजय दराडे यांची नियुक्ती करण्यात आली आहे. पुणे शहरातील कायदा व सुव्यवस्था तसेच गुन्हेगारी नियंत्रणाच्या दृष्टीने या बदल्याकडे महत्त्वपूर्ण म्हणून पाहिले जात आहे.
दरम्यान, पुणे शहर गुन्हे शाखेचे अतिरिक्त पोलीस आयुक्त पंकज देशमुख यांच्या जागी राज्य राखीव पोलीस बल गट क्रमांक १ च्या समादेशक तेजस्वी सातपुते यांची बदली करण्यात आली आहे. गुन्हे शाखेतील तपास आणि संघटनात्मक कामकाजात सातपुते यांच्या नियुक्तीमुळे नवे बदल अपेक्षित मानले जात आहेत.
कोल्हापूर परिक्षेत्राचे विशेष पोलीस महानिरीक्षक सुनील फुलारी यांची राज्य गुन्हे अन्वेषण विभागात बदली करण्यात आली आहे. तसेच जिंतूर (परभणी) येथील सहाय्यक पोलीस अधीक्षक जीवन देवाशिष बेनिवाल यांची पुणे शहर पोलीस दलात उपायुक्त म्हणून नियुक्ती करण्यात आली आहे.
अमरावती जिल्ह्यातील अचलपूरचे सहाय्यक पोलीस अधीक्षक शुभम कुमार यांची पुणे ग्रामीण पोलीस दलाच्या अतिरिक्त अधीक्षकपदी बदली करण्यात आली आहे. ग्रामीण भागातील कायदा व सुव्यवस्था आणि गुन्हे तपासाच्या दृष्टीने ही नियुक्ती महत्त्वाची मानली जात आहे.
ठाणे पोलीस आयुक्तालयातील अतिरिक्त आयुक्त एस. व्ही. पाठक यांची पुणे येथील राज्य अन्वेषण विभागात बदली करण्यात आली आहे. याशिवाय राज्य गुन्हे अन्वेषण विभागात अधीक्षक पदावर कार्यरत असलेले एमसीव्ही महेश्वर रेड्डी यांची पदोन्नतीने सीआयडीमध्ये उपमहानिरीक्षकपदी नियुक्ती करण्यात आली आहे.
राज्य शासनाच्या या बदल्यांमुळे विविध पोलीस विभागांमध्ये प्रशासकीय कार्यपद्धतीत गती येण्याची अपेक्षा व्यक्त होत असून, आगामी काळात कायदा व सुव्यवस्था व्यवस्थापन अधिक सक्षम करण्याच्या दृष्टीने या नियुक्त्या महत्त्वाच्या मानल्या जात आहेत.