बारामतीत रोहित पवारांना प्रशासकीय धक्का; दीड तासांच्या चर्चेनंतरही डीजीसीए आणि ‘व्हीएसआर’विरोधात एफआयआरला पोलिसांचा नकार
पोलीस महानगर नेटवर्क
बारामती: राष्ट्रवादी काँग्रेसचे नेते आमदार रोहित पवार यांना बारामतीत एका प्रशासकीय अडथळ्याला सामोरे जावे लागले. नागरी विमान वाहतूक महासंचालनालय (DGCA) आणि व्हीएसआर (VSR) कंपनी यांच्याविरोधात तक्रार दाखल करण्याच्या उद्देशाने पवार बारामती पोलिस ठाण्यात दाखल झाले होते. मात्र, तब्बल दीड तास चाललेल्या सविस्तर चर्चेनंतरही पोलिसांनी तात्काळ एफआयआर नोंदवण्यास नकार दिला.
मिळालेल्या माहितीनुसार, बारामती पोलिस ठाण्यात रोहित पवार आणि वरिष्ठ पोलिस अधिकाऱ्यांमध्ये सुमारे एक तास पंचवीस मिनिटांची प्रदीर्घ बैठक झाली. या बैठकीत पवार यांनी प्रकरणातील घटनाक्रम, आपल्याकडे उपलब्ध असलेली माहिती आणि आक्षेप सविस्तरपणे मांडले. संबंधित बाबींचे कायदेशीर आणि तांत्रिक पैलू स्पष्ट करण्याचा त्यांनी प्रयत्न केला.
तथापि, चर्चेनंतर पोलिसांकडून कायदेशीर अडचणी व तांत्रिक कारणांचा दाखला देत तात्काळ एफआयआर नोंदवता येणार नसल्याचे स्पष्ट करण्यात आले. त्यामुळे दीड तासांच्या ‘मॅरेथॉन’ चर्चेनंतरही पवारांच्या पदरी निराशाच पडली. पोलिसांनी नेमक्या कोणत्या कारणांमुळे गुन्हा दाखल करण्यास असमर्थता दर्शवली, याबाबत अधिकृत स्पष्टीकरणाची प्रतीक्षा आहे.
या घडामोडींमुळे बारामतीत राजकीय आणि प्रशासकीय वर्तुळात चर्चा सुरू असून, पुढील पावले काय असतील याकडे लक्ष लागले आहे.