भरधाव ट्रॅव्हलर बसच्या धडकेत ८ वर्षीय मुलाचा मृत्यु; कुटुंबावर दुःखाचा डोंगर
योगेश पांडे / वार्ताहर
रायगड – माणगावमध्ये अवघ्या आठ वर्षांच्या आरुष नावाच्या लहानग्याचा भरधाव ट्रॅव्हलर बसच्या धडकेत दुर्दैवी मृत्यू झाला आहे. सायकलचा टायर दुरुस्त करून घरी परतणाऱ्या आरुषचा हा अपघात माणगाव शहरातील मोर्बा रोडवर झाला असून या घटनेमुळे परिसरात हळहळ व्यक्त केली जात आहे.
मिळालेल्या माहितीनुसार, बुधवारी दुपारी सुमारे १.३० वाजता हा अपघात घडला. आरुष समीर गुगले (८) हा आपली आई साची गुगले आणि आजोबा शांताराम गुगले यांच्यासोबत होंडा प्लेझर स्कुटी क्र. एम.एच.०६ सी.जे.२०६३ ने माणगाव शहरातील मोर्बा रोडवरील साई सायकल मार्ट येथे आले होते. आरुषच्या सायकलचा टायर दुरुस्त करण्यासाठी दिला होता आणि तो घेण्यासाठी ते रस्त्याच्या कडेला थांबले होते. त्याच वेळी, माणगाव बाजूकडून मोर्बा बाजूकडे अतिवेगाने येणाऱ्या ट्रॅव्हलर बस क्र. एम.एच.१२ वाय.बी.७१४८ ने उभ्या असलेल्या दुचाकीला जोरदार धडक दिली. ही धडक इतकी भीषण होती की आरुष रस्त्यावर फेकला गेला आणि त्याला गंभीर दुखापत झाली.
स्थानिक नागरिकांनी तातडीने मदत केली आणि जखमी आरुषला रुग्णालयात नेण्याचा प्रयत्न केला. मात्र, उपचारांपूर्वीच आरुषचा मृत्यू झाल्याचे डॉक्टरांनी घोषित केले. या अपघातात आरुषची आई साची समीर गुगले (३६) यांनाही दुखापत झाली. दुचाकी आणि बस या दोन्ही वाहनांचेही नुकसान झालं असून अवघ्या आठ वर्षांच्या मुलाच्या मृत्यूने गुगले कुटुंबावर दुःखाचा डोंगर कोसळला आहे.
या प्रकरणी माणगाव पोलीस ठाण्यात गुन्हा रजिस्टर नंबर १३/२०२६ अन्वये भारतीय न्याय संहिता कलम १०६ (१), १२५ (अ), १२५ (ब), २८१ आणि मोटार वाहन कायदा कलम १८४ अंतर्गत गुन्हा दाखल करण्यात आला आहे. आरोपी चालकाला अद्याप अटक झालेली नाही आणि पुढील तपास सुरू आहे. पोलीस निरीक्षक निवृत्ती बोऱ्हाडे यांच्या मार्गदर्शनाखाली सहाय्यक पोलीस निरीक्षक नरेंद्र बेलदार या प्रकरणाचा तपास करत आहेत.