तोतयेगिरीचे नवीन प्रकरण समोर!
सहा महिन्यांपासून हॉटेलमध्ये वास्तव्यास असलेल्या तोतया महिला आयएएस अधिकाऱ्याला अटक; २६ नोव्हेंबरपर्यंत पोलिस कोठडी
योगेश पांडे / वार्ताहर
छत्रपती संभाजीनगर – सहा महिन्यांपासून एका हॉटेलमध्ये वास्तव्यास असलेल्या एका तोतया आयएएस महिला अधिकाऱ्याला विशेष शाखेसह सिडको पोलिसांनी ताब्यात घेतले. या महिलेकडे आयएएस नियुक्तिपत्राची झेरॉक्सही सापडली आहे. ताब्यात घेतलेल्या महिलेचे नाव कल्पना त्रिंबकराव भागवत (४५) असे आहे. बनावट आधार कार्डवरून या तोतया महिलेचे बिंग फुटल्याची माहिती पोलिसांनी दिली.
या प्रकरणात सिडको पोलिस ठाण्याच्या विशेष शाखेचे हवालदार सतीश बोर्डे (४६) यांनी दिलेल्या तक्रारीनुसार, २२ नोव्हेंबर सतीश बोर्डे हे रामा हॉटेल येथे बंदोबस्तावर होते. या ठिकाणी एक उच्चपदस्थ महिला ही गेल्या सहा महिन्यांपासून हॉटेल ॲम्बेसेडर मध्ये राहत असल्याची माहिती मिळाली. सदर महिला ही संशयित असल्याचीही माहिती मिळाली होती. या आधारे पोलिस निरीक्षक अतुल येरमे यांच्या सुचनेनुसार, हर्सुल ठाण्याच्या निरीक्षक स्वाती केदार, सहायक निरीक्षक अरुणा घुले, वर्षा काळे व विशेष शाखेचे पथक रात्री आठ वाजता हॉटेल ॲम्बेसेडर येथे पोहोचले.
या ठिकाणी या पथकाने आधी संबंधित महिलेची माहिती काढली. सदर महिला ही रूम नंबर ३३३ मध्ये राहत होती. सदर पथकाने सदर महिलेने रूम घेण्यासाठी दिलेल्या कागदपत्राची तपासणी केली. या तपासणीत सदर महिलेचा आधार कार्ड हा बनावट तसेच या आधारकार्डवर खाडाखोड असल्याची स्पष्ट दिसून आले. या आधारे रूम नंबर ३३३ येथे सदर महिलेची महिला पेालिस अधिकाऱ्यांनी तपासणी सुरू केली. या तपासणीत तिने स्वत:चे नाव कल्पना भागवत असल्याचे सांगितले. आधार कार्डबाबत खाडाखोडबाबत तिने समाधान कारक उत्तर दिले नाही. तसेच तिच्या जवळ असलेल्या सामानाची तपासणी केली असता, या ठिकाणी भारतीय प्रशासकीय सेवेत (आयएएस) नियुक्तिपत्राचीही झेरॉक्स प्रत आढळून आले. या प्रकरणात सदर महिलेला ताब्यात घेण्यात आले आहे. पोलिस हवालदार सतीश बोर्डे यांच्या तक्रारीवरून तोतया आयएएस महिला अधिकारी कल्पना भागवत हिच्या विरोधात सिडको पोलिस ठाण्यात गुन्हा दाखल करण्यात आला आहे.
या प्रकरणात तोतया आयएएस अधिकारी कल्पना भागवत हिला ताब्यात घेतल्यानंतर, तिला कोर्टासमोर हजर करण्यात आले. कोर्टात हजर केले असता, सदर तोतया महिला अधिकारी कल्पना भागवत हिला कोर्टाने २६ नोव्हेंबरपर्यंत पेालिस कोठडीचे आदेश दिले, अशी माहिती पोलिस निरीक्षक अतुल येरमे यांनी दिली.