पुण्यात सराईत गुन्हेगारांचा कांड, घरात घुसून बजरंग दलाच्या कार्यकर्त्याला मारहाण
योगेश पांडे / वार्ताहर
पुणे – पुण्यातील कोंढवा पोलीस ठाण्याच्या हद्दीत धक्कादायक प्रकार घडला आहे. इथं एका बजरंग दलाच्या कार्यकर्त्याला पाच जणांनी घरात घुसून मारहाण केली आहे. आरोपी एवढ्यावरच नाही थांबले तर त्यांनी कार्यकर्त्याला जीवे मारण्याची धमकी देखील दिली आहे. या प्रकरणी कोंढवा पोलीस ठाण्यात पाच जणांविरोधात गुन्हा दाखल केला आहे. या घटनेचे सीसीटीव्ही फुटेजही समोर आले असून, पोलिसांनी पुढील तपास सुरू केला आहे. मिळालेल्या माहितीनुसार, पुण्यातील कोंढवा भागात बजरंग दलाचा कार्यकर्ता आपल्या घरात असताना काही रेकॉर्डवरील गुन्हेगारांनी त्याच्या घरात घुसून त्याला मारहाण केली. आरोपींनी तरुणाला घराबाहेर ओढत आणत तिथेही लाथा बुक्क्यांनी मारहाण केली. आरोपी एवढ्यावरच थांबले नाहीत, तर त्यांनी तरुणाला जीवे मारण्याची धमकीही दिल्याचा आरोप कार्यकर्त्याकडून करण्यात आला आहे. ही सर्व घटना परिसरातील एका सीसीटीव्ही कॅमेऱ्यात कैद झाली आहे.
या घटनेनंतर बजरंग दलाच्या कार्यकर्त्यांनी तत्काळ कोंढवा पोलीस स्टेशनमध्ये धाव घेतली आणि तक्रार दाखल केली. पोलिसांनी घटनेचे गांभीर्य लक्षात घेऊन पाच आरोपींविरोधात गुन्हा नोंदवला आहे. पाचही आरोपी रेकॉर्डवरील गुन्हेगार आहेत. या घटनेमुळे परिसरात तणावाचे वातावरण निर्माण झाले आहे. ही मारहाण नेमकी कशामुळे झाली? याची अधिकृत माहिती अद्याप समोर आली नाही. मात्र जुन्या वादातून हा हल्ला केल्याचं सांगितलं जातंय.