कल्याण पूर्वेकडील मलंगडच्या शेलारपाडा येथे कोंबड्यावरून मोठा वाद; तीन जणांवर गुन्हा दाखल
योगेश पांडे / वार्ताहर
कल्याण – शेजाऱ्यांचा कोंबडा आपल्या घरात आल्याने त्याला हुसकविण्यासाठी दगड मारल्याने रक्तरंजित राडा झाला आहे. कल्याण पूर्वेतील मलंगगडच्या शेलरपाडा येथे हा प्रकार घडला आहे. या नाट्यमय राड्यानंतर हिललाईन पोलिसांनी तिघांवर गुन्हे दाखल केले असून तपास सुरू केला आहे. या घटनेने परिसरात मोठी खळबळ उडाल्याचे बघायला मिळत आहे. कल्याण पूर्वेतील मलंगगडच्या शेलारपाडा गावच्या आदिवासी पाड्यावर कोंबड्याला दगड मारल्यावरून वाद उफाळला. विलास वाघे यांचा कोंबडा गुरुनाथ वाघे यांच्या घरी गेला होता. दुसऱ्यांच्या कोंबडा आपल्या घरी आल्याने त्याला मनीषा वाघे यांनी दगड मारून त्यांनी हुसकावून लावलं होत. मात्र, कोंबड्याला दगड मारल्याचा राग आल्याने विलास वाघे याने गुरुनाथ वाघे याच्या पत्नीला जाब विचारून शिवीगाळ करण्यास सुरुवात केली. हा वाद टोकाला गेला आणि थेट मारहाण सुरू झाली.
पत्नीला शिवीगाळ करण्याचे कारण विचारण्यास गेलेल्या गुरुनाथ वर विलास याने दगड फेकून डोकं फोडलं. गुरुनाथ वाघे यास गंभीर दुखापत झाल्याने तो खाली पडला. या संधीचा फायदा घेत त्याला विलास वाघे, कैलास वाघे, कुंदन वाघे यांनी देखील मारहाण केली आहे. तर सुरू असलेल भांडण सोडविण्यासाठी गेलेला मेव्हणा बाळाराम वाघे याला देखील बेदम मारहाण करण्यात आली. लाकडी दांडक्याने थेट त्याला मारहाण करण्यात आली आहे. या हाणामारीत जखमी झालेल्या दोघांवर रुग्णालयात उपचार करून सोडण्यात आले आहे. मात्र, या हाणामारीची मलंगगड परिसरात जोरदार चर्चा सुरू झाली आहे. या प्रकरणाचा अधिक तपास हिललाईन पोलीस ठाण्याचे पोलीस हवालदार संदीप मुसळे करत आहेत. हिललाईन पोलीस ठाण्यात तीन जणांवर गुन्हे दाखल करण्यात आली आहेत. कोंबड्याला दगड मारल्याच्या रागातून मोठा राडा झाल्याचे बघायला मिळाले. पोलिसांकडून या प्रकरणी अधिकचा तपास हा केला जातोय.