कमरेला पिस्तूल लावून फिरणाऱ्याला २१ वर्षीय तरुणाला अटक; पिस्तुलासह दोन जिवंत काडतुसे जप्त
योगेश पांडे/वार्ताहर
शिक्रापूर – शिरुर शहरात कमरेला बेकायदेशीरपणे पिस्तुल लावून फिरणाऱ्या सराईत गुन्हेगाराच्या मुसक्या आवळल्या आहेत. स्थानिक गुन्हे अन्वेषण विभागाच्या पथकाला आरोपीला पकडण्यात यश आले आहे. निखील सतीश थेऊरकर असे पोलिसांनी जेरबंद केलेल्या सराईत गुन्हेगाराचे नाव आहे. शिरुर शहरात रेकॉर्डवरील सराईत गुन्हेगार असलेला निखील थेऊरकर हा कमरेला बेकायदेशीरपणे पिस्तुल लावून फिरत असल्याची माहिती गुन्हे अन्वेषण विभागाच्या पथकाला मिळाली, त्यांनतर स्थानिक गुन्हे अन्वेषण विभागाचे पोलीस निरीक्षक अविनाश शिळीमकर, शिरुरचे पोलीस निरीक्षक संदेश केंजळे यांच्या मार्गदर्शनाखाली सहाय्यक पोलीस निरीक्षक कुलदीप संकपाळ, पोलीस हवालदार तुषार पंदारे, जनार्दन शेळके, संजय जाधव, राजू मोमीन, मंगेश थिगळे यांनी शिरुर शहरात सापळा रचत शिरुर येथील बाह्य वळण रस्त्यालगत निखील यास ताब्यात घेतले.
आरोपीची झडती घेतली असता त्याच्या कमरेला पिस्तुल मिळून आला, दरम्यान पोलिसांनी त्याच्याजवळील पिस्तुल व दोन जिवंत काडतुसे जप्त करत निखील सतीश थेऊरकर – २१ याच्याविरुद्ध गुन्हा दाखल केला असून, पुढील तपास शिरुर पोलीस करत आहे. अवैधरित्या पिस्तूल बाळगणाऱ्यांची संख्या वाढली आहे. तरुण गुन्हेगारीतील आकर्षण तसेच दहशतीसाठी पिस्तूल घेऊन फिरत असल्याचे दिसत आहे. त्यासोबतच सराईत गुन्हेगार भितीपोटी देखील पिस्तूल बाळगत असल्याचे समोर आलेले आहे. या पार्श्वभूमवीर पोलिसांकडून गस्तीवर भर देण्यात आलेला आहे.