पुण्यात गॅरेजमध्ये उभ्या असेलेल्या सीएनजी रिक्षामध्ये स्फोट; एकाचा जागीच मृत्यू, तिघेजण जखम
योगेश पांडे/वार्ताहर
पुणे – पुण्यात एक अपघाताची विचित्र घटना घडली आहे. पुण्यातील बी. टी.कवडे रोडवर रिक्षाचा मोठा अपघात झाला आहे. यात गॅरेजमध्ये उभ्या असलेल्या सीएनजी रिक्षामध्ये अचानक स्फोट झाल्याची घटना घडली आहे. हा स्फोट इतका भीषण होता की रिक्षातील एकाचा जागीच मृत्यू झाला आहे. तर या अपघातात इतर तीन लोक जखमी झाले असून त्यांच्यावर रुग्णालयात उपचार सुरू असल्याची माहिती पुढे आली आहे. पुण्यातील बी.टी.कवडे रस्ता, नवशा गणपतीपुढे भंगार मालाचा साठा असणाऱ्या पत्र्याच्या शेडमध्ये हा स्फोट झाल्याची घटना घडली आहे. घटनेची माहिती मिळताच अग्निशमन दल आणि पोलीस घटनास्थळी दाखल झाले. मिळालेल्या माहितीनुसार शुक्रवारी संध्याकाळी ५.३० च्या सुमारास बी.टी. कवडे रोड येथील एका भंगाराच्या दुकानांमध्ये जुन्या फ्रिजच्या गॅस सिलेंडरचा स्फोट झाला आहे. हा स्फोट इतका भीषण होता की या घटनेत एका व्यक्तिचा जागीच मृत्यू झाला असून इतर तीन व्यक्ति जखमी झाले आहेत. या जखमी व्यक्तींना कामी हॉस्पिटलमध्ये रवाना करण्यात आले आहे.पुढील योग्य ती कायदेशीर कारवाई करून घेत असल्याची माहिती पोलिसांनी दिली आहे. मात्र या अपघाताच्या घटनेने परिसरात एकच खळबळ उडाली आहे. मात्र हा अपघात नेमका कशामुळे झाला हे अद्याप कळू शकलेले नाही.