मुंबई-अहमदाबाद राष्ट्रीय महामार्गावर बर्निंग ट्रकचा थरार; चारोटी टोलनाक्यावर धावत्या ट्रकला भीषण आग
योगेश पांडे/वार्ताहर
पालघर – मुंबईत जोगेश्वरी येथे चालत्या कारला आग लागल्याचे प्रकरण नुकतेच घडलेले असताना, पुन्हा एकदा वाहनाला आग लागल्याची घटना घडली आहे. या वेळी आग एका ट्रक ला लागली असून लोकांनी ‘बर्निंग ट्रक’ चा थरारक अनुभव घेतला. या घटनेत सुदैवाने कोणतीही जिवीत हानी झालेली नाही. मुंबई-अहमदाबाद राष्ट्रीय महामार्गावर बर्निंग ट्रकचा थरार पहावयास मिळाला आहे. मुंबई अहमदाबाद राष्ट्रीय महामार्गावर धावत्या ट्रकला अचानक आग लागल्याची घटना घडली आहे. राष्ट्रीय महामार्गावर चारोटी टोलनाका येथे धावत्या ट्रकला अचानक आग लागली व काही क्षणातच आगीने रौद्ररूप धारण केले. ट्रकच्या केबिन परिसरात मोठी आग उफाळली. ट्रकला आग लागल्याची बाब टोलनाका परिसरात असलेल्या स्थानिकांच्या निदर्शनास येताच फायर एस्टिंगविशरच्या मदतीने ट्रकला लागलेली आग विझवण्याचा प्रयत्न केला. घटनेची माहिती मिळताच वाहतूक पोलीस व स्थानिक पोलीस, अग्निशमन दलाचे जवान घटनास्थळी दाखल झाले व ट्रकला लागलेल्या आगीवर नियंत्रण मिळवण्यात आले आहे.
शॉर्टसर्किटने ही आग लागल्याचा प्राथमिक अंदाज वर्तवण्यात आला असून आगीचे कारण मात्र अस्पष्ट आहे. इमारतींसाठी लागणारे मटेरियल सप्लाय करणारा हा ट्रक असून, ट्रकला आग लागल्याची बाब निदर्शनास येताच ट्रक चालकाने ट्रक रस्त्याच्या कडेला उभा केला व चालक ट्रकमधून वेळीच बाहेर पडला. ट्रक चालकाच्या प्रसंगावधानामुळे सुदैवाने जीवितहानी टळली आहे. मात्र आग लागल्याने ट्रकचे मोठे नुकसान झाले आहे.