पुण्यात महिलेचा पाठलाग करुन अश्लील शेरेबाजी, ३ रोडरोमीयोंवर गुन्हा दाखल
पोलीस महानगर नेटवर्क
पुणे – पुण्यात दिवसेंदिवस गुन्हेगारी वाढत चालली आहे. सांस्कृतिक व विद्येचे माहेरघर म्हणून ओळखलं जाणारं पुणे आता गुन्हेगारीचे माहेरघर म्हणून ओळखले जाईल की काय अशी भीती पुणेकरांना वाटत आहे. अशीच एक घटना बिबवेवाडी परिसरात घडली आहे. बिबवेवाडी परिसरात राहणारी महिला कामावरुन जात असताना तीन जणांनी तिचा पाठलाग करुन अश्लील शेरेबाजी केली. तसेच स्त्री मनास लज्जा उत्पन्न होईल असे कृत्य करुन विनयभंग केला. ही घटना जगताप डेअरी परिसरात घडली. याबाबत ३१ वर्षीय महिलेने बिबवेवाडी पोलीस ठाण्यात फिर्याद दिली असून त्यानुसार सागर किसन धुमाळ, योगेश ढेबे, हरि राठोड (तिघे रा. अंबिकानगर, अप्पर बिबवेवाडी, पुणे) यांच्यावर भा.द. वि. कलम ३५४, ५०९, ५०६, ३४ नुसार गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी कामावरुन घरी जात असताना सागर धुमाळ याने जवळ येऊन हात पकडला तसेच तु मला खुप आवडते असे म्हणून अश्लील वर्तन केले. तर इतर आरोपींनी अश्लील शेरेबाजी करुन अश्लील हातवारे केले. हरी राठोड याने बघून घेण्याची धमकी देऊन असभ्य वर्तन केल्याचे फिर्यादीत नमूद केले आहे. यापप्रकरणी पुढील तपास बिबवेवाडी पोलीस करीत आहेत.