मुलुंड हादरलं ! गुटख्यासाठी पैसे दिले नाहीत म्हणून १७ वर्षाच्या मुलाचा खून
पोलीस महानगर नेटवर्क
मुंबई – मुंबईतून एक धक्कादायक घटना समोर आली आहे. गुटख्यासाठी पैसे दिले नाहीत म्हणून अवघ्या १७ वर्षांच्या मुलाला जीवे मारण्यात आले. या घटनेमुळे एकच खळबळ माजली असून पोलिसांनी याप्रकरणी तिघांना अटक केली आहे. महाराष्ट्रात गुटखाबंदी लागू आहे मात्र तरीही सर्रासपणे सर्वच पान टपऱ्यांवर पान मसाल्याच्या स्वरुपात गुटखा मिळत आहे. काळ्या बाजारात वाढीव किंमतीत हे पदार्थ मिळत असल्याचं पुन्हा एकदा सिद्ध झालं आहे.
पोलिसांकडून मिळालेल्या माहितीनुसार,मुलुंड पश्चिम येथे खुनाची ही धक्कादायक घटना घडली आहे. हुसेन ताज हुसैन खान असे मृत तरूणाचे नाव असून तो अवघ्या १७ वर्षांचा होता. वसंत गार्डन परिसरातील एका धबधब्याजवळ ही हत्या करण्यात आली. पीडित मुलगा त्याच्या १६ वर्षीय मित्रांसह परिसरात गेला असता तिघांचे टोळके सदर मुलाकडे आले, पीडित तरूणाकडे त्यांनी गुटख्याची मागणी केली. मात्र त्याने देण्यास नकार दिल्याने त्या मुलाशी तिघे जण वाद घालू लागले. भांडणादरम्यान, संतापाच्या भरात एका तरूणाने सुरा काढला आणि पीडित तरूणावर सपासप वार केले, त्याची छाती, हाता-पायांवर वार करून ते तिघेही तेथून फरार झाले. या हल्ल्यात जखमी झालेल्या पीडित मुलाला उपचारांसाठी तातडीने अग्रवाल हॉस्पिटलमध्ये नेण्यात आले. मात्र तेथे डॉक्टरांनी त्याला तपासून मृत्यू झाल्याचे घोषित केले. या घटनेची माहिती मिळाल्यानंतर पोलिसांनी खुनाचा गुन्हा दाखल करत आरोपींचा शोध सुरू केला. याप्रकरणी एकूण ३ आरोपींना पोलिसांनी अटक केली असून पोलीस अधिक तपास करीत आहेत.