वाघोलीत स्पा सेंटरच्या नावाखाली सुरू असलेल्या संतापजनक काळ्या धंद्याचा पुणे पोलिसांच्या गुन्हे शाखेकडून पर्दाफाश; ५ पीडित महिलांची सुटका
योगेश पांडे / वार्ताहर
पुणे – पुण्यातील वेगाने विकसित होणाऱ्या वाघोली परिसरात सध्या गुन्हेगारांनी पोलिसांसमोर मोठे आव्हान उभे केले आहे. वाघोलीतील एका खोलीत गेल्या काही दिवसांपासून संशयास्पद हालचाली सुरू होत्या. आजूबाजूच्या नागरिकांना तिथे काहीतरी अघटीत घडत असल्याचा सुगावा लागला. शेवटी, हा संशय इतका बळावला की थेट पोलिसांनीच इथे धाव घेतली. अखेर वाघोलीत एका नामांकित स्पा सेंटरच्या नावाखाली सुरू असलेल्या एका अत्यंत संतापजनक काळ्या धंद्याचा पुणे पोलिसांच्या गुन्हे शाखेने पर्दाफाश केला आहे.
वाघोलीतील बकोरी फाटा परिसरातील एका स्पामध्ये मसाजच्या नावाखाली चक्क देहव्यापार चालवला जात असल्याची धक्कादायक माहिती पोलिसांना मिळाली होती. त्यानुसार पोलिसांनी कसलाही सुगावा लागू न देता थेट ‘बनावट ग्राहक’ पाठवून असा काही सापळा रचला की, या चक्रव्यूहात स्पा चालक अडकला. या धडक कारवाईत पोलिसांनी तिथून ५ पीडित महिलांची सुटका केली असून एका आरोपीला बेड्या ठोकल्या आहेत.
गुन्हे शाखेच्या ‘मानव तस्करी व अनैतिक व्यापार प्रतिबंधक कक्षाला’ एका खबऱ्याकडून अत्यंत गोपनीय माहिती मिळाली होती. वाघोली येथील बकोरी फाटा परिसरात असलेल्या ‘९ सेन्सेस स्पा’मध्ये बाहेरील महिलांना आणून त्यांच्याकडून अनैतिक देहव्यापार करून घेतला जात असल्याचं समोर आलं. माहिती मिळताच पोलीस निरीक्षक छगन कापसे यांच्या मार्गदर्शनाखाली पोलिसांनी तात्काळ या स्पा सेंटरवर पाळत ठेवली.
माहितीची १००% खातरजमा करण्यासाठी पोलिसांनी आधी एका बनावट ग्राहकाला ठरवून दिलेल्या प्लॅननुसार ‘९ सेन्सेस स्पा’मध्ये पाठवले. तिथल्या मॅनेजरने पैशांची मागणी करून जेव्हा ग्राहकाला मुलगी पुरवण्याची तयारी दर्शवली, तेव्हा इशारा मिळताच दबा धरून बसलेल्या पोलीस पथकाने संपूर्ण स्पा सेंटरला वेढा घातला आणि अचानक छापा टाकला. अचानक झालेल्या या कारवाईमुळे स्पा सेंटरमध्ये एकच पळापळ आणि खळबळ उडाली.
पोलिसांनी या छाप्यात कारवाई करत स्पा सेंटरच्या कचाट्यात सापडलेल्या ५ पीडित महिलांची सुखरूप सुटका केली आहे. याप्रकरणी पोलिसांनी अनैतिक धंदा चालवणाऱ्या महावीर सुदाम ससाणे (२९) या मुख्य आरोपीला रंगेहात अटक केली आहे. या काळ्या धंद्यात सामील असलेल्या दुसऱ्या एका आरोपीविरोधातही गुन्हा दाखल करण्यात आला असून पोलीस त्याचा शोध घेत आहेत. याप्रकरणी वाघोली (लोणीकंद) पोलीस ठाण्यात गुन्हा दाखल करण्यात आला आहे.