अंबरनाथच्या हॉटेलमध्ये तरुणीने केलेल्या आत्महत्येप्रकरणी बड्या व्यावसायिकाविरोधात अखेर गुन्हा दाखल; भगवान लोटे याची रात्री अडीच वाजेपर्यंत चौकशी
योगेश पांडे / वार्ताहर
अंबरनाथ – अंबरनाथच्या S-3 पार्क हॉटेलमध्ये एका तरुणीने केलेल्या आत्महत्ये प्रकरणी भगवान लोटे याच्या विरोधात आत्महत्येस प्रवृत्त केल्याचा गुन्हा दाखल करण्यात आला आहे. यानंतर लोटे याला अटक केली जाणार असल्याची माहिती पोलिसांनी दिली आहे. १० एप्रिल रोजी भगवान लोटे याने तरुणीला एस-३ पार्क हॉटेलच्या रूम नंबर ३१० मध्ये बोलावून तिच्याशी प्रत्यक्ष, कॉल, चॅटिंग करून वाद घालत मानसिक त्रास दिला आणि आत्महत्येस प्रवृत्त केलं, असा आरोप तिच्या कुटुंबीयांनी केला आहे. याप्रकरणी अंबरनाथ पश्चिम पोलिसांनी भगवान लोटे विरोधात आत्महत्येस प्रवृत्त केल्याचा गुन्हा दाखल केलाय. हा गुन्हा अजामीनपात्र असल्याने आरोपीचा शोध घेऊन अटक केली जाईल, अशी माहिती वरिष्ठ पोलीस निरीक्षक शब्बीर सय्यद यांनी दिली आहे.
मिळलेल्या माहितीनुसार, मृत तरुणी ही भगवान लोटेच्या कंपनीत अकाउंटंट म्हणून काम करत होती. त्यांच्यात प्रेमसंबंध होते, तसंच लोटे हा मृत तरुणीकडून मनी लॉंडरिंगचं काम करून घेत होता. मात्र, तिला काम सोडण्याची इच्छा असताना तिने काम सोडू नये म्हणून भगवान तिच्यावर दबाव टाकत होता, असा आरोप तरुणीच्या कुटुंबीयांनी केला आहे.
दरम्यान, हॉटेलमध्ये तरुणीने नैराश्यातून गळफास घेत आत्महत्या केलीय. कालांतराने हॉटेल स्टाफच्या मदतीने दरवाजा उघडला असता तरुणीचा गळफास घेतलेल्या अवस्थेत आढळली. त्यामुळे हॉटेल स्टाफने पोलिसांना पाचारण केलं. पोलिसांनी पंचनामा करून मृतदेह ताब्यात घेतला, तसंच भगवान लोटे याची रात्री अडीच वाजेपर्यंत चौकशी केली. दरम्यान, या प्रकरणात पोलिसांकडून आरोपीला वाचवलं जात असल्याचा आरोप केला जात होता. अशातच भगवान लोटेवर आत्महत्येस प्रवृत्त केल्याचा गुन्हा दाखल करण्यात आला आहे. यानंतर लोटे याला अटक केली जाणार असल्याची माहिती पोलिसांनी दिली आहे. त्यामुळे पुढे या प्रकरणात नेमकी काय कारवाई होते, याकडे सगळ्यांचं लक्ष लागलं आहे.