नाशिकात सागर जाधववर गोळीबार प्रकरणी भाजपचे माजी नगरसेवक जगदीश पाटील अटकेत
योगेश पांडे / वार्ताहर
नाशिक – नाशिकमध्ये वाढत्या गुन्हेगारी घटनांमुळे राजकीय वर्तुळात खळबळ उडाली असताना, पंचवटीतील गोळीबार प्रकरणात भाजपचे माजी नगरसेवक जगदीश पाटील यांना पोलिसांनी अटक केली आहे. भाजपच्या माजी नगरसेवकावर झालेली ही सलग दुसरी कारवाई असल्याने या घटनेची मोठी चर्चा सुरू आहे.
गेल्या आठवड्यात पंचवटीतील फुलेनगर भागात सागर जाधव या तरुणावर अज्ञातांनी गोळीबार केला होता. या हल्ल्यात सागर जाधव गंभीर जखमी झाला असून, त्याला दोन गोळ्या लागल्या होत्या. या प्रकरणाचा तपास करताना पोलिसांनी भाजपचे माजी नगरसेवक जगदीश पाटील यांना अटक केली आहे.
विशेष म्हणजे, काही दिवसांपूर्वीच नाशिकमधील राहुल धोत्रे हत्याकांड प्रकरणी भाजपचे आणखी एक माजी नगरसेवक उद्धव निमसे अटकेत गेले होते. त्यामुळे एकापाठोपाठ दोन माजी नगरसेवकांवर झालेल्या या कारवाईमुळे भाजपच्या प्रतिमेवर परिणाम होत असल्याची चर्चा राजकीय वर्तुळात रंगली आहे.
दरम्यान, भाजप नेते आणि मंत्री गिरीश महाजन यांच्या नाशिक दौऱ्यादरम्यानच ही अटक झाल्याने या कारवाईकडे सर्वांचे लक्ष लागले आहे. पोलिसांचा तपास सुरू असून, या प्रकरणाचा पुढील तपास वेगाने करण्यात येत आहे.