शिवसेनेच्या कार्यकर्त्यावर शिवसेनेच्याच एका व्यक्तीला चिरडून ठार मारल्याचा आरोप; आरोपी कार्यकर्ता फरार
योगेश पांडे / वार्ताहर
ठाणे – एकनाथ शिंदे यांचा बालेकिल्ला असलेल्या ठाण्यामध्ये एक धक्कादायक घटना घडली आहे. एकनाथ शिंदे यांच्या शिवसेनेच्या कार्यकर्त्यावर एका व्यक्तीला चिरडून ठार मारल्याचा आरोप करण्यात आला आहे. ज्याची हत्या झाली तो देखील शिंदे गटाचाचा कार्यकर्ता असल्याची माहिती समोर येत आहे. संतोष पवार उर्फ संद्या असं या आरोपीचे नाव असून घटनेनंतर तो फरार झाला आहे. ही घटना मंगळवारी रात्री घडल्याचे सांगण्यात येत आहे. ठाण्यातील वागळे इस्टेट, परिसरातील आयटी सर्कल जवळ, रोड नंबर २७ वर हा प्रकार घडला.
मंगळवारी गौरी गणपतीच्या विसर्जनाची धामधूम सुरू असतानाच हा प्रकार घडल्याने ठाण्यात खळबळ उडाली. ज्या व्यक्तीचा यात मृत्यू झालाय त्याचे नाव विठ्ठल गायकर असल्याचे कळते आहे. त्याचा खून का करण्यात आला, याबद्दलची माहिती अद्याप मिळालेली नाही. संतोष पवार उर्फ संद्या हा नामचीन गुंड असल्याचे कळते. तो शिंदेंच्या शिवसेनेचा कार्यकर्ता होता. ठाण्यातील शिंदेंच्या निवासस्थानापासून अंदाजे १ किलोमीटर अंतरावर असलेल्या वागळे इस्टेट परिसरात ही घटना घडली आहे. ज्यामुळे या प्रकरणाचे गांभीर्य अजून वाढले आहे. मिळालेल्या माहितीनुसार संतोष पांढऱ्या रंगाची फॉक्सवॅगन कार चालव होता. याच कारने विठ्ठलला उडवले होते.
विठ्ठल जागीच ठार व्हावा यासाठी त्याच्या अंगावरून २-३ वेळा गाडी नेण्यात आली. गाडीने चिरडल्याने विठ्ठलचा जागीच मृत्यू झाला तर अन्य एक जण जखमी झाला आहे. दुसऱ्या जखमी व्यक्तीवर रुग्णालयात उपचार सुरू आहेत. त्याच्या प्रकृतीबद्दल अद्याप माहिती मिळालेली नाही. श्रीनगर पोलीस ठाण्यात सदर प्रकरणी गुन्हा नोंदवण्यात आला असून पोलीस अधिक तपास करत आहेत.