पत्नीने प्रियकरासोबत मिळून पतीचा केला खून; अँटॉपहील पोलिसांनी २ तासात दोघांच्याही आवळल्या मुसक्या
मुंबई – राजीव गांधी नगर, न्यू ट्रांझिट कॅम्प, अनाबिया मेडिकल स्टोअरजवळ राहणारा इस्माईल शेख (वय २७), जो हाताने भरतकाम करण्याचं काम करतो, याचा खून त्याची पत्नी सुमैया (वय २५) हिने आपल्या प्रियकर सकलैन ऊर्फ झप्पर (वय ३०) याच्या मदतीने केला. सोमवारी सकाळी सुमारे ८.३० वाजता शेजाऱ्यांनी इमारतीच्या पहिल्या मजल्यावरील गॅलरीत रक्ताचे थेंब पडताना पाहिले आणि तात्काळ पोलिसांना माहिती दिली. अँटॉपहील पोलिसांनी घटनास्थळी पोहोचल्यावर गॅलरीत इस्माईल शेखचा मृतदेह आढळून आला. त्याच्या गळ्यावर धारदार शस्त्राने वार केल्याचे निशाण होते.
पोलिसांनी घरात सुमैया यांच्याकडे चौकशी केली. मात्र ती उडवाउडवीची उत्तरे देत होती, त्यामुळे पोलिसांनी तिला ताब्यात घेतले. मृतदेहाला पोस्टमार्टमसाठी सायन रुग्णालयात पाठवण्यात आले. पोलिसांनी आपल्या पद्धतीने सखोल चौकशी केली असता, सुमैयाने अखेर कबुल केले की, तिने आपल्या प्रियकर सकलैन ऊर्फ झप्परसोबत मिळून पतीचा खून केला आहे. सकलैन झवेरी बाजारात सोन्याच्या दागिन्यांचे पॉलिशिंग करणाऱ्या कारखान्यात काम करतो आणि तोही अँटॉपहील परिसरात राहतो. अँटॉपहील पोलिसांनी केवळ २ तासात सकलैनला अटक केली. चौकशीत असं समोर आलं की, हत्या केल्यानंतर मृतदेह लपवण्याचा त्यांचा प्लॅन होता, पण सकाळ झाली आणि घाबरून सकलैन पळून गेला. पोलिसांनी दोघांनाही अटक केली असून खूनाचा गुन्हा नोंदवून पुढील तपास सुरू आहे.