अपघात कवरेज करणाऱ्या पत्रकारांना शिवीगाळ; देहूरोड पोलीस ठाण्यात गुन्हा दाखल, आरोपींचाचा शोध सुरु
योगेश पांडे/वर्ताहर
पिंपरी-चिंचवड – अपघातग्रस्त टेम्पोचे वार्तांकन करणाऱ्या पत्रकारांना दमदाटी आणि अश्लील शिवीगाळ केल्याची घटना देहूरोड पोलीस ठाण्याच्या हद्दीत घडली आहे. याप्रकरणी देहूरोड पोलीस ठाण्यात संबंधित प्रसार माध्यमांच्या पत्रकारांनी तक्रार दिली आहे. ही घटना बुधवारी दुपारच्या बाराच्या सुमारास घडली. पोलिसांनी दिलेल्या माहितीनुसार, प्रसार माध्यमांचे दोन पत्रकार वार्तांकन करून पिंपरी- चिंचवडच्या दिशेने येत होते. तेव्हा, देहूरोड- निगडी रोडवर भरधाव टेम्पो एम.एच. १४ जी.डी. ३३०३ दुभाजकाला धडकून पलटी झाला. अपघात समोरच घडल्याने पत्रकारांनी दुचाकी थांबवली. घटनेचे वार्तांकन करत मोबाईलमध्ये चित्रीकरण करत असताना टेम्पो चालक आणि मालक यांनी अश्लील शिवीगाळ करत धमकावले. या घटनेचा व्हिडिओ देखील समोर आला आहे. घटने प्रकरणी देहूरोड पोलीस ठाण्यात अदखलपात्र गुन्हा दाखल करण्यात आला आहे. अज्ञात टेम्पो चालक आणि मालकाचा शोध देहूरोड पोलीस घेत आहेत. ही सर्व घटना वाहतूक पोलिसांसमोर घडली. पोलिसांसमोरच ही घटना घडल्याने पोलिसांचा धाक आहे की नाही? असा प्रश्न निर्माण झाला आहे.