धुळ्यात गावठी कट्टासह जिवंत काडतूस बाळगणारा आरोपी पोलिसांच्या जाळ्यात
योगेश पांडे / वार्ताहर
धुळे – जिवंत काडतुसासह गावठी कट्टा बाळगणाऱ्या इसमाच्या चाळीसगाव रोड पोलिसांनी मुसक्या आवळल्या आहेत. वडजाई रोड जवळील बीएसएनएल ऑफिस जवळ एक इसम गावठी कट्टा बाळगून असल्याची, चाळीसगाव रोड पोलीस ठाण्याचे सहाय्यक पोलीस निरीक्षक जीवन बोरसे यांना खात्रीलायक सूत्रांकडून माहिती मिळाली होती. या माहितीच्या आधारे चाळीसगाव रोड पोलिसांनी संबंधित ठिकाणी जाऊन संशयास्पद असलेल्या व्यक्तीला सापळा रचून ताब्यात घेतले. त्या व्यक्तीची अंगझडती घेतली असता त्याकडे गावठी कट्टा पोलिसांना आढळून आला. इसमाकडे गावठी कट्टा यांसह चार जिवंत काडतूस देखील पोलिसांना आढळून आले आहे. चाळीसगाव रोड पोलिसांनी या इसमाला ताब्यात घेतले असून त्याच्याकडील गावठी कट्टा व जिवंत काडतूस देखील हस्तगत केले आहे. शकील शेख सलीम शेख उर्फ शकील सेंधवा – ४१ व्यवसाय मजुरी, राहणार इस्लामी डे स्कूल वडजाई रोड धुळे असे अटक केलेल्या व्यक्तीचे नाव आहे. त्याच्याकडे गावठी बनावटीचा कट्टा, ४ काडतूस असा एकूण ३७ हजार रुपये किंमतीचा मुद्देमाल जप्त करण्यात आला आहे.
या प्रकरणी चाळीसगाव रोड पोलीस ठाण्यात गुन्हा दाखल करण्यात आला असून पुढील तपास पोलीस हेड कॉन्स्टेबल अविनाश वाघ करीत आहे.